To Skytalker and Lilokpelikula

Sana balang araw makasulat ako ng katulad n’yo, yung tipong kapag nasa MRT ako at naisip ko, “ay gusto kong magsulat sa kung gaano nakakainis sumakay sa Makati ng alas-sais y media ng gabi kasi dun nasusubok ang pagkakaroon ko ng urbanidad at good manners and right conduct, pero nakakamiss din ang sikip na ito, huli kong rutang ganito e fresh grad pa ako, at gustung-gustung-gustong maging direktor, kahit na nasa mali akong industriya, at least direktor pa rin” e pagdating ko sa office, pagbukas ng laptop, ay masusulat ko nga, hindi na iniisip kung maganda ba yung unang pangungusap kasi maganda naman, tapos tuluy-tuloy hanggang mapunta sa huling salita, hindi iniisip kung maganda ba yung pagtatapos, kasi maganda naman, tapos pipindutin na ang Publish, tapos may makakabasa, na akala mo ay isa o dalawa o tatlo lang, kasi bihira lang ang may kukomento, pero yung isa sa mga nakabasang yun, hindi n’yo alam, gustong makasulat na tulad nyo, na hindi man kumomento, e ginusto namang magsulat, kahit gaano kaikli, tungkol sa inyo.

At ang mas masarap dun, nakasulat naman.#