Ilaya Ilaya

Kiltepan Viewpoint, Sagada, Mountain Province (Photo by Antoinette Jadaone)

Anak, ipaalala mo sa akin, kapag marunong ka nang maglakad nang malayu-layo at kaya mo nang tumalon nang mataas-taas, dadalhin kita sa Sagada, doon sa tuktok, sa Kiltepan, suot ang pinakamakapal mong jacket, at tuturuan kitang abutin ang langit.

Kailangan mong tumingkayad, anak, kailangan mong tumalon, kailangan mong itaas ang iyong mga kamay, kailangan mong pumikit, basta aabutin natin ang langit. Para kung sakaling may manubok mang-inggit sa’yong kaklaseng nakapunta na siya sa Disneyland, o sa Hongkong, o sa Korea, hindi siya magtatagumpay. Mapupuntahan din natin ang mga iyon, anak, balang araw, pero hindi lahat, naabot na ang langit.

“Nay, pangit ba ‘ko?”
“Anak, bili ka nga ng San Mig. Mahaba-habang inuman ‘to.”

“Nay, pangit ba ‘ko?”
“Busy ako.”